只要你接觸過iherb，你就會明白佢嘅魅力如何令你一次再次咁去瀏覽，無聲無色咁令你沈淪，無它，因為確實平靚正！
事隔一個月，第二次再戰iherb，今次先做左小小功課，睇過下網評邊啲係熱賣產品賣番黎試下，由落單計，3日就送到家中，感覺超爽！
運送嘅紙箱包得好妥當，比起我上次買thayers化妝水好，上次只係用幾層膠袋包住，送到時差不多磿穿了，相對今次，今次包得好好，可能今次買後多嘢，還是iherb改良了？
九秒九開箱之後，等我地遂一快速檢閱下買左啲乜啦！
首先講下左下角嗰幾支化妝掃，之前一直心大心細想買啲平平地又高質素嘅化妝掃，見過好多人推介sigma同real techiques，嗰日係iherb見到Real Techniques啲掃好平，既然口碑咁好，買了以下三支﹕
- Expert face brush, USD9
- Blush brush, USD9
- Retractable Kabuki Brush, USD10
咁既價錢，有咁既質素，呢三支都大推呀！毛質幼滑豐滿，感覺好實在好舒服，頭兩支都多人讚，第三支係新款伸縮Kabuki方便帶出街或去旅行用，好正！之前一直覺得用化妝掃必定要用動物毛，拎住real techniques喺手令我完全改觀，佢都同樣有好強嘅抓粉力！總之就大推啦！
跟住繼續講化妝掃，睇下圖中下黑白色嘅ELF Kabuki掃，我覺得買左佢又唔介紹比人就真係唔夠朋友喇！超平…比你估下佢賣幾錢…佢啲毛質軟到呢…好似隻公仔咁…好軟棉棉，好滑嘟嘟…好好好舒服…難怪一直都咁多人讚話ELF啲掃抵用…因為佢真係好抵…開估啦…佢係USD6…即係唔洗50蚊港幣！實在無得頂，無辦法可以challenge佢！我真係諗唔明點解佢有個咁嘅質地唔賣貴啲！我十級推薦大家一人買一支！
講開ELF，講埋佢盒胭脂，真係抵到嚇親！大拿拿USD3…點解會咁㗎！仲要好出色，呢盒coral色，隻色相當大路，好啱返工用…最慘係…我覺得佢呢隻色有8成似我盒Nars胭脂呀！都係嗰句，買啦，買黎試下啦！試過你就明我講乜喇！
之後講下相片下方橙色盒Sibu beauty嘅沙棘子油（sea buckthorn seed oil)賣USD27.96 , 呢支好野黎架，我之前睇過徐淑敏介紹，話呢隻油有好強力嘅修復功能，特別用係傷口可以埋口埋得好好，我見到iherb有，諗都唔諗就買，日常我可以用喺G完暗瘡時搽，傷口可以好快埋，之後冇結疤，真係好好！但記得記得呢隻油係光敏感的，唔可以用完去曬太陽，所以我就會揀佢臨瞓前用，最安心！
Hurraw潤唇膏好多人都介紹過，iherb賣USD3.37，因為多人讚我至買黎試的，有些少失望，因為唔算好潤，但味道取勝，咁我又明個咀咁近個鼻，如果用一支潤唇膏有自已鐘意嘅味道又真係賞心樂事！所以難怪佢大紅，佢真係有好多款做得好似嘅味道…為到港紙廿幾蚊…冇所謂啦！夏天用都啱的！買啦買啦！
Thayers玫瑰花水之前都講過，以USD8.96有呢隻水準確係神級推介，想知佢有幾好，去睇番我之前嘅片啦（Thayers化妝水介紹）！
跟住講下中間白色嗰支Now food出品嘅「甘油」…甘油好有用㗎，市面大部份嘅護膚品都係加入甘油黎幫大家保濕鎖水！我買黎都係想咁用，不過用甘油係一定要溝水用的，因為佢天性會吸水，你唔溝水直接搽上皮膚佢就會反過黎吸你皮膚啲水，所以一定要溝水用。佢仲可以溝定水用黎噴頭髮，有輕微定型作用又可保濕。用佢黎溝砂糖加水做磿沙都好好㗎，一邊保濕一邊去死板角質！而且…佢只係USD6.87…有排用！
講下右上角盒黑色嘅番皂先…登登登…佢就係好多人勁讚嘅Nubian Heritage, African Black Soap Bar，簡稱「非洲黑皂」，佢成份天然，專門對付有問題嘅皮膚，甚至話濕疹都可以得到改善，用佢黎洗面洗身都無問題，氣味馥郁芳香！價錢USD3.47…用完有效果再報告！
右邊呢5排Chocolove嘅海鹽黑朱古力真係唔講得笑，超級好味…十級推薦！USD2.99一排，可能我大鄉里啦…但真係冇食過咁過癮嘅朱古力…一邊甜，突然又咸！好得意好好味！我一定會再大手購入追劇時食！
網上買嘢又點會咁一帆風順㗎…總會踩下地雷嘅…最後呢盒綠色盒嘅St. Dalfour, 芒果綠茶…中晒招啦！USD3.32一盒…芒果怪味綠茶…可能我唔鐘意嗰芒果乳酪溝綠茶嘅感覺…唉…好難頂呀！買呢個茶加USD0.95可以買多一隻杯…而家唯有當用左USD4買左個杯黎安慰自己啦！
另外，每次係iherb買嘢，記得埋單前去「freebies」度揀一樣免費禮物入購物籃先去結帳，今次我地揀左隻保溫杯…不過質數就…哈哈…杯蓋都開唔到呀！免費就算啦！
Iherb購物TIPS
﹣ 記得check單，今次我就送漏貨喇，拿拿聲email去佢地客戶服務，三日就回覆退回已扣數金額到信用咭！行動迅速值得一讚！
﹣ 首次於iherb購物於埋單時輸入referral code即可享有額外優惠，今次我地頭USD40減USD10，每張單總額超過USD60再額外全數5﹪折扣！七除八扣差好多㗎！我個referral code : JVS563 歡迎隨便使用！當你用我個code去得到你個優惠同時我就可以儲分，到你完成第一次購物，你又會得到自己嘅referral code，到時你就可以介紹比朋友喇！
﹣ 運費，我地買左咁多，加左USD8用DHL送貨，頭尾3日到，又快又安心！
我地都拍左條片比大家睇，希望大家鐘意呢個分享，like = like， subscribe訂閱=支持我地…多謝！
去埋我地freeminder嘅youtube channel睇埋其它嘅片啦！
留言列表
