呢排天氣咁飄忽，加上天文台之前話過預測到今年會特別多雨水，而我真係再抵受唔住返工時比雨水整濕對鞋要UP住一日既苦況，亦唔再想過住著拖鞋間水而比啲污水浸住隻腳既日子。思前想後…終於…我好認真咁考慮到底買唔買水靴好！得人驚既係…考慮過後，我竟然一口氣買左兩對我一直認為唔係必需品既鞋…兩對專為落雨而設既鞋！
今日就係想同大家分享點去選購一對水靴喇！我綜合左一對稱職既水靴應具備既基本條件，仲拍埋片，今次示範埋我呢兩對水靴既款式有幾修身，唔想睇文字既朋友，馬跳去睇片啦！
去片﹕http://youtu.be/Id59dnz0_iE
買水靴前，我都算叫做做過下功課，因為我認為買得呢類咁功能性既鞋多少都係有要有啲要求既，而且現今水靴款式好多，價錢亦豐儉由人，云云咁多款式點揀好呢？
首先當然係要靚，唔靚買黎做乜呀？哈哈！我唔想著住對水靴比人話似賣魚佬…所以我睇過市面幾個較多人討論既牌子，覺得市面上既水靴由幾十蚊對起都做得好靚，七彩繽紛，靚到呢…令人係落雨天都有好心情！最後我揀左Aigle，原因係我想搵對elegant啲可以返工對到既水靴，而且我想要修身啲既款式…呢對Aigle個款式仲好似一對皮boots，我覺得著得好睇！
買開有條癮…呢頭搞掂返工嗰對，轉頭買埋放假著既防水鞋，我揀左Palladium既漆皮軍靴款，雖然我呢對唔可以浸落水氹，但表面既漆皮幫手跣下水都可以既，而且佢個底係防滑的，落雨著就啱晒喇，而我呢對Palladium仲有兩個樣著法，好抵呀！仲有，Palladium另有一條line係全防水的，如果你想買水靴但又唔想買傳統款式，或者可以考慮Palladium呀！
其實要買水靴，真正最重要既係夠輕、防水、防跣、唔焗腳！
- 夠輕既水靴會令你著得夠輕鬆，真正做到水上飄！哈哈…反之…唉…總之我覺得輕身係重要啦！
- 防水我又唔擔心，反正所有水靴都用膠做，防水冇難度啦！但購買時都要留意啲接洽位係咪緊密，唔係一樣會入水呀！
- 防跣…真係好重要，如果對水靴會跣，根本得物無所用，購買時同樣要留意鞋底係咪用防跣物料！
- 唔焗腳呢…我覺得呢點都重要，因為潮濕日子如果對靴啜腳都幾辛苦，但呢點都幾考對鞋既物料，有人話買闊身啲就透氣啲，但我又唔想對鞋太bulky，所以我選左Aigle，佢地啲膠好柔軟，感覺上易著易除、相對冇咁焗！
最後，提醒大家，買膠水靴要試啱size，因為啲膠唔會好似皮革咁，唔會著著下變鬆架！所以買水靴時要試真啲！
希望大家都買到啱你地既水靴去迎接呢個雨季啦！
留言列表
