Emmii的部落格

見到上次敗家情報第一回反應幾好，我地今日又「的」起條根同大家分享下呢期敗左啲乜嘢，我地都係凡人黎嘅啫，當然都有失手嘅時候，今日嘅分享無論好同唔好嘅嘢都講下啦！

同之前一樣，今次嘅分享都有拍到片，方便大家認下啲產品嘛，去片﹕http://youtu.be/PyiVapPCTfc

1. Macadamia髮尾油，終於都敗左呢支網上好多人讚嘅髮尾油喇，果然名不虛傳！我個人覺得好值得買，因為佢同Moroccanoil比較，價錢平成截，但論質素則有過之而無不及，好後悔買得太遟！大家見我把頭髮又漂又染都好乾啦，最啱試髮尾油，用左佢即時柔順番晒，髮尾冇一堆草咁，漂到甩晒色個執仲軟番晒，堅係好用！佢仲有一個功能好特別，就係洗完頭濕髮時用佢再吹頭，可以好快就吹乾，減少熱風吹頭嘅時間，從而減少傷害，而且氣味仲好香添！如果你有睇片，你仲會見到我地同時比較埋Loreal同韓國嗰支Monaco Argan髮尾油添！我個人覺得暫時呢幾支比較，Macadamia勝出！絕對值回票價！

2. Shu uemura white recovery ex…希望我咁講冇得罪人啦！真係唔好用，好普通嘅lotion咁，但咁普通嘅質素唔洗買到shu uemura囉…錢多咩！冇咩效果，用左等如無用，用多兩用仲發敏感添…好嬲呀！

3. Nature Republic - Natural Fermentation Rose Foam Cleanser，呢支玫瑰洗面膏有驚喜呀！平靚正！佢嘅主要成份係保加利亞玫瑰水同埋大馬士革玫瑰水，所以一開就有好香嘅玫瑰味，而且佢用左大米發酵嘅成份，話可以美白㗎！未見到白左之前，我覺得佢好易起泡，洗完塊面仲好乾淨，水嫩柔軟，有種亮麗嘅感覺，又唔會掹掹緊，最重要係抵，專門店賣百二蚊300ml，有排用！正！我推呢支！

4. Hope Girl - Soft cream eyes，呢個係韓國品牌，我地揀左隻粉紅色嘅eye cream，嘩，佢個質地滑到呢，我真係覺得佢滑過relvon color tattoo同bobbi brown，用佢黎做打底，有提亮效果，認真唔錯呀！控油效果亦唔錯，試得過！

5. Estee Lauder Advanced Night Repair II，第九支，呢支係我買嘅第九支！我真係好鐘意ANR，一年四季晚晚都用，作為一支咁多功能嘅精華液，淡斑袪縐緊緻保濕收毛孔樣樣都做到，我真係搵唔到佢有乜唔好！遇到好倦，好殘嘅日子，我仲會拎佢黎做妝前打底，怎至用佢黎溝粉底上粉，即時靚晒！無得頂呀！我會繼續回購！我愛ANR！

6. 家下買個有牌子嘅手袋郁啲都一萬幾千，真係唔捨得，早兩日去左旺角一個樓上outlet買左兩個幾唔錯嘅手袋，分別係Vivienne Westwood同Hunter，好啱日常返工行街用，但價錢當然公道好多啦！哈哈！

7. 買下貴嘅又走去行下12蚊店，買左幾條沙巾，都想介紹下比各位JM，因為用沙巾洗面好好，易清潔毛孔呀！

8. Optrex愛滴氏洗眼藥水，日常化得眼妝多，隻眼有時都覺得會入左啲化妝品，我地就定期會洗下眼，保護下眼睛嘛，呢期屈臣氏做特價呀，快啲去入貨！

9. 黑糖薑母茶，如果你有飲開薑茶，就要試下呢隻，好夠味呀！JM們如果有M痛嘅煩惱都可以試下飲黑糖薑茶，有啲幫助㗎！呢隻比起坊間其它嗰啲更夠味，真心推！

10. 呢個拉鍊盒仔係M﹠M朱古力嘅贈品，幾好呀，我地拎黎放headphone，唔洗次次喺手袋好似釣魚咁摷條headphone出黎！

11. 樂敦Lycee 眼藥水，呢個係朋友係日本買比我，好舒服呀，我好倦時滴兩滴，即時醒晒，去埋紅筋，我鐘意呢個！

呢期喺買左呢啲嘢啫，希望大家睇呢個分享都睇得開心啦，鐘意嘅比個Like吖！Subscribe我地個youtube channel支持下我地再敗多啲嘢下次同大家分享吖！